Aminu Abdullahi

Zanga-zanga ta barke  a kwalejin ilimi ta Sa’adu Rimi da kuma kwalejin koyar al’amuran addinin musulunci ta Aminu Kano wato LEGAL da kuma kwalejin fasaha ta jihar Kano (polytechnic) sakamakon rufe makarantun da gwamnati tayi.

Kano Focus ta ruwaito a daren jiya ne gwamnatin Kano ta bayar da umarnin rufe dukkanin makarantun da ke jihar nan, lamarin da ya harzuka daliban.

Ko da ya ke har yanzu ba a kai ga sanin dalilin da ya sanya gwamnatin rufe makarantun ba, rahotanni na cewa hakan na da nasaba da sace daliban makarantar Kankara da ke jihar Katsina.

Dubban dalibai ne dai suka yi cirko-ciroko a bakin makarantun nasu suna ala wadai da matakin rufewar da gwamnati ta dauka, da ga bisani kuma alhinin nasu ya rikide zuwa zanga-zanga.

A zagayen da Kano Focus ta yi ta iske makarantun a kulle ya yin da kuma dalibai suka yi cirko cirko a bakin Kofar makarantun nasu.

An  kuma hangosu suna raira wakoki na nuna rashin jin dadinsu kan matakin rufe makarantun da gwamnati tayi.

Mubaraq Muhammad dake karatu a kwalejin ilimi ta Aminu Kano (Legal) ya ce ya yi matukar kaduwa  da ya samu labarin cewa gwamnati ta bada umarnin sake rufe makarantu.

“Wancan hutun da muka sha ya mai dani baya yanzu kuma an sake kulewa gashi mun kusa fara jarabawa.

“Ilimi kullum koma baya ake samu a kasar nan, kuma matukar aka ci gaba da tafiya a haka, toni karatun ma denawa zanyi,” a cewar sa.

Aisha Sani Abdulkadir  daliba ce da aka iske suna zaman alhini a bakin kwalejin, ta ce sai bayan da ta zo kofar makarantar ne sannan ta fahimci cewa an rufe makarantu sakamakon hana ta shiga da akayi.

Ta ce duk da an hanasu shiga makarantar sai kuma aka sa jami’an ‘yan sanda suka rinka korar su wanda hakan tamkar cin zarafi ne.

“Kaga wadan da za suyi shekara uku yanzu sai sun shekara hudu, masu shekara biyu kuma yanzu sai sun shekara uku, karatun mu yana ta tambal tambal,” a cewar ta

Ta kara da cewa dalibai suna cikin wani hali wanda zaman gida ke kara musu damuwa sosai.

Salma Muhammad cewa tayi rufe makarantun ya sa tillas su Dakata da rubuta jarabawa da sukeyi.

Ta ce a ranar Juma’a mai zuwa ne suke sa ran kammala jarabawar su sai gashi an fitar da wannan sanarwa.

Shi ma Abubakar Tahir dalibi a kwlejin LEGAL cewa ya yi amfada musu cewa sace yara da akayi a jihar Katsina ne yasa aka rufe musu makarantu.

Ya kara da cewa ba sunayin zanga-anga don tada fitina bane, sai don su nuna rashin goyon bayan su kan matakin da gwamnatin ta dauka.

Ya ce ko ya zauna a gida ma bashi da abinyi ko wata sana’a da za ta debe mishi kewa.

Ya kuma ce rashin sanin aikin shugabanin kasar nan  ya sa suka gaza baiwa dalibai tsaro da al’ummar kasa wanda hakan yasa ake sace su.

Abubakar Muhammad dalibi a kwalejin fasaha ta jihar Kano cewa ya yi sun zo ne da zummar yin karatu sai aka hana su shiga.

Wasunmu sabbin dalibai ne wasu kuma sun ma fara jarabawa kuma ba a wani jima da dawowa daga zaman gida na korona ba.

“Ba wani dalili da aka fada mana kawai haka aka ce mu fito a rufe kuma ba a fada mana lokacin da za a dawo ba.

“Dole ne muyi zanga zanga don ancuce mu ba kadan ba, domin ni yanzu banma san ranar da zan gama makarantaba,  kuma inaso nayi aure,” a cewar sa.