Zulaiha Dajuma

Tun bayan da aka daura auren Sulaiman Isa da Janine Sanchez a ranar Lahadin da ta gabata, al’umma a Kano ke ta tofa albarkacin bakinsu.

A zantawar jaridar Kano Focus da wasu matasa a nan Kano sun ce burin da mata ke da shi ne ya sanya ake haurowa har gida ana dauke musu mazajensu.

Ya yin da  wasu kuma sukace  kwadayin mazanne da neman biyan wata bukata ya sanya suke makalewa matan turawan, ya yin da wasu kuma saka ce hadi ne kawai daga Allah.

A soke lefe ko mu daina auren na gida

Wani matashi Abubakar Adamu Damisa ya ce yanzu lokaci ya yi da yakamata mata su cire buri da kwadayi su fuskanci abinda ya ke dai-dai.

“Ni a matsayina na saurayi zan iya cewa abune da muke farin ciki da shi, kuma Allah ya kawo irin su, suyi ta dauke samarin tunda su matanmu na nan burikan su sun fiye yawa”

“Turawa ba ruwansu da lefe da sauran abubuan da suka rufewa mata ido.

“Yanzu sai dai kawai a zo a dau ango ba kamar yadda aka saba gani ana daukan amarya ba.

“Idan matanmu basu dawo sunyi karatun ta nustuba, to tabbas za a fara ci gaba da duko turawa ana kyalesu gaba daya.

To sai dai a cewar wani matashi kuma dan gwagarmaya Aliyu Samb,  auren Sulaiman wani al’amari ne da ya zo da sabon salo.

Ya ce  auren ya nuna yadda zumunci ya ke da kuma damar auratayya a tsakanin muslmi da kuma ahlil kitabi.

“Ita baturiya, shi kuma dan Najeriya, akwai banbanci mutuka a tsakanin su ya zamanto kamar kulla zumunci ne.

“Irin wanna ake fata duniya ta samu, domin zai taimaka wajen wanzar da zaman lafiya a tsakanin kabilu mabanbanta da kuma addinai.

Ba zamu watsar da matan gida ba

Aliyu Samba ya kuma yi watsi da kalaman da ke cewa, mazan Kano za su watsar da matan gida domin su koma auren turawa.

Ya ce ai ba namijin da yake tsallake matar da Allah ya rubuta masa.

Idan baturiya aka rubuto masa to zai aura, idan kuma tamu ta gida aka rubuto masa to komai kwadayin sa da waccan din sai dai ya kalla daga nesa.

“Kaddarar mutune ke tabbata, ba auran matan turai ne zai sa matan mu na gida su kasa auruwa ba, haka auren mu na gida ba shi ne zai sa turawa su ki auruwa ba.

“Mazan turai za su iya zuwa nan su auri mata bakake, anyi, kuma anayi, mazan mu za su iya auran matansu matanmu za su iya auran mazajen su ba laifi bane” A cewar sa.

Kwadayi ne ya kaishi auren baturiya

Ita kuwa wata budurwa anan Kano Amina Adam ta ce, ita dai a fahintar ta kwadayi ne da son cimma wata manufa ya sanya Sulaiman Auren Janine.

Ta ce ta zauna a kasar turawa ta kuma ga yadda suke gudanar da rayuwar soyyayar su, a cewar ta ba ko sahakka lamarin su ba soyayya ba ce, illa nufin cimma wani buri.

“ Ban taba ganin wanan a matsayin soyayya ba, duk da dai jama’a na cewa soyayya ce.

“A matsayina na wadda ta taba zama a turai, duk da dai na san shi bai taba zama kasar turai ba, na ga irin wadannan  aururrukan.

Ana amfani da turawane domin a cimma wani burin na rayuwa, ciki kuwa har da neman takardar zama a turai.

Ta kuma ce dukkanin wanda ke ganin auren Sulaiman ya budewa maza Kofar auren turawa to shakka ba bu yana cikin hadari mai yawa, domin ba zai fahinci al’amarin ba har sai ya shiga cikn sa.