Zulaiha Danjuma

Zainab Nasir fitacciyar yar gwagwarmayar nan a nan Kano ta mayar da martani kan suka da jama’a ke  yi mata a shafukan sada zumunta biyo bayan ganinta da aka yi a bikin Sulaiamn da Janine.

Idan za a iya tunawa, Zainab Nasir ta shiga tsaka mai wuya ne bayan da ta yi wani furuci a shafinta na Facebook da ya ke cewa yin aure ba nasara ba ne’.

Lamarin dai ya jawo mata zagi da tsinuwa daga bakin jama’a da dama a jihar nan.

To sai dai ‘yar gwagwarmanyar ta ce kawai ana so a munanan mata za to ne, ya sanya aka dauki maganarta ba dai-dai ba aka kuma yadata da gangan dan a jawo mata zagi.

An dai gano Zainab Nasir ne cikin wasu hotunan bikin Sulaiman da aka wallafa tana  walwala a lokacin da ake tsaka da shan biki.

Hakanne ya sanya jama’a da dama suka dinga aike mata da martani da kuma rubutu a shafukan sada zamunta na cewar ita da ba ta dauki aure da muhimmanci ba me kuma ya kaita walwala da jin dadi a auren wasu.

Hamisu Doguwa na daga cikin wadanda suka mayar mata da martini inda ya rubuta a shafinsa na Facebook tsohuwar budurwarsa ce ta halrci daurin auren.

Shi ma wani Kabiru Isa ya ce “wacce ta ce aure ba Nasara bane kun ganta ta halarci dauren auren wasu tana murna”

Ba a yi min adalci ba

Sai dai a zantawar ta da jaridar Kano Focus Zainab Nasir ta ce abin ya bata mamaki yadda jama’a suka bar batun auren suka koma chaccakarta kuma sam ba a yi mata adalci ba.

“Mutane a social media ba za su yi magana a kan abun daya dace ba sai akan abun da bai ma cancanci ayi magana ba.

“Yanzu a halin da Arewa ke ciki muna da abubuwa da dama da ya kamata a dinga fada, kamar rashin tsaro da sace sacen yaran makarantu da ake yi amma ba za a fada ba sai wani abu can marar amfani.

“Abun bai ban haushi ba kuma bai batamin rai ba, sai dai abun ya ban mamaki” A cewar ta

Zainab ta kuma mayar da martanin kan zarigin da ake yi mata na cewa ta soki aure.

“Yawancin mutane ko kadan basu fahinci rubutun da nayi a baya ba ballanta su fahici sakon da ya ke ciki.

“In zan iya tunawa nayi rubutun a watan Mayun shekarar 2019, sama da shekara daya kenan da ‘yan watanni.

Lokacin da na yi wannan rubutun manufata shi ne nayi magana akan yadda ake tsangwamar mata da basu da aure a cikin al’umma.

“Ana ganin duk wani iliminsu, basirarsu ko wani abu na girma da suka samu bashi da wata daraja.

“ Yadda mata ke shan wahala a hannun wasu mazajen, na tauye musu hakkinsu ne ya sanya na ce yin aure a wurin airin wadannan matan ba Nasara bane.

Mace na yin auren don ta huta ta kuma samu ci gaban rayuwa, amma sai jama’a suka datse rubutun sama da na kasan suka fito da iya kalmar auren ba Nasara bane.

“Wannan shi ne tsantsar rashin adalci a ganina, da an fuskanci lamarin da ba a zarge ni ba.

“Nayi kira ne ga wanda suke tsangwamar mata wanda basu da aure a kan cewa su dena”  A cewar ta.

Sai dai ta ce ko kadan bata yi nadamar abinda ta rubuta ba tun da ida ita ba aure ta soka ba wahalar da ke cikin auren ta soka.