Connect with us

Hausa

Gazawar shugabanni ne rikicin da ya faru a wasan Kano Pillars da Katsina United

Published

on

Jamilu Uba Adamu

Hamayya da adawa tsakanin magoya bayan kungiyoyin kwallon kafar Kano Pillars da Katsina United tsohon lamari ne wanda ya dade a tsakaninsu.

Don haka ne ma kusan duk lokutan da Kungiyoyin biyu za su kara akan tanadi jami’an tsaro na musamman domin kare afkuwar hatsaniya a tsakanin bangarorin biyu.

A wasu lokuta ma akan ba da umarnin yin wasa a tsakaninsu ba tare da ‘yan kallo ko magoya baya ba.

Hatsaniya da rikici marasa dadi sun sha faruwa a tsakanin Kungiyoyin Kwallon kafar dake makwabtan jihohin biyu.

Sai dai hatsaniyar da aka samu a wasan da aka gudanar a ranar Asabar a filin wasa na Sani Abacha dake unguwar Kofar Mata, a jihar kano, tsakanin Kungiyoyin biyu ya yi muni kwarai da gaske.

Dalilin hakan kuwa, shi ne wannann wasa ya kasance na farko a cikin shekara biyu da kungiyar kwallon kafar ta Kano Pillars ta samu damar dawo wa gida jihar Kano don gudanar da wasanninta. Wanda a baya take gudanar da su a Garin Kaduna. Kafin daga baya ta mayar da wasanin nata filin wasa na Umaru Dikko a Jihar Katsina.

A garin na katsina, sun gudanar da wasa biyu, kwatsam ba zato ba tsammani sai ga takarda ta futo daga hannun hukumar gudanar da wasan Kwallon Kafa na ajin kwarraru ta Kasa ( LMC ) an umarci Kungiyar da ta karbi bakuncin Kungiyar Kwallon kafar ta Katsina United  a filin wasa na Sani Abacha.

Magoya bayan Kano Pillars sun gaza jure fushi

 Mahukuntan kungiyar kwallon kafar ta Kano Pillars tare da jungiyar magoya bayanta ba su yi amfani da wannan damar da suka samu ba, na dawo da kungiyar gida jihar Kano ba.

Kasancewar ba wani tanadi da akai dan hana faruwar barkewar rikici da hatsaniya a filin wasan. A mintuna na saba’in da tara ne alkalin wasa da ‘yan kwallo suka fita daga filin wasa don tserar da rayuwarsu, bayan afkawa cikin fili da wasu masu ikirarin goyan bayan kungiyar kwallon kafa ta Kano Pillars suka yi, sun shigo filin da makamai, wasu Kuma na jifa da duwatsu.

A wannnan lokacin wasan Yana kunnen doki (0-0)

A karshe gurbatattun magoya bayan kungiyar kwallon kafar ta Kano Pillars sun huche haushin su a kan motar ‘yan wasan Katsina United. Inda sukayi wa motar raga-raga.

‘Yan wasan na katsina United ba su samu damar fita daga dakin da aka boye su ba a filin wasan, kasancewar wasu gurbatattun magoya baya na jiran fitowarsu don su ci musu mutunci, har sai misalin karfe takwas na dare kamar yadda na samu labari.

‘Yan wasan, sun yi asarar wayoyinsu, takalma, da wasu abubuwa masu amfani da suka ajiye a cikin motar daukar ta su.

Abun da mafi yawan masu bibiyar wasan kwallon Kafa suke tambaya shi ne; wane shiri shugabannin kungiyar kwallon kafar ta Kano Pillars suka yi don kare afkuwar wannan hatsaniyar?

Wane Dalili ne ya janyo mahukuntan LMC suka ba da izinin yin wannann wasa a Kano ( Kuma harda Yan Kallo ) duk kuwa da cewar sunfi kowa sanin rikicin da aka yi tsakanin nagoya bayan kungiyoyin biyu a Jihar Katsina, wacce ta yi muni kwarai a baya?

Bayan sanin da suka yi sarai na tarihin adawar dake tsakanin kungiyoyin biyu?

Akwai wata riba ko alfanu da wasu ko wani zai anfana bisa faruwar wannann hatsaniyar?

Wacce rawa ko mataki shugabannin kungiyar magoya baya suka dauka wajen ganin an yi wasan lafiya an kuma tashi lafiya, kasancewar sun fi kowa sanin magoya bayan kungiyar?

Wanda suka aiwatar da wannnan aika aika ‘yan kungiyar magoya baya ne ko wasu ne daban suka aiwatar? Idan wasu ne ba ‘yan kungiyar ba, me yasa aka bar su suka bata wa kungiyar suna?

Me ya sa shugabannin kungiyar kwallon kafa ta Kano Pillars ba su samar da kyakkyawan tsaro ba?

Kullum haka za a cigaba ba za ai gyara da wayarwa magoya baya kai ba musamman akan harkar goyan baya ba tare da rigima da hatsaniya ba?

A Ina Kungiyar zata cigaba da wasanni nata?

Wannan sune kadan daga cikin tambayoyin dake bukatar amsa.

Musamman daga wurin shugabannin kungiyar kwallon kafar ta Kano Pillars da kuma kungiyar magoya baya.

Gaskiyar magana dai koma su waye suka aiwatar da wannan aika-aika ba su yi wa magoya baya na gaskiya da ita kan ta kungiyar adalci ba.

Kuma wannan ba nuna kauna ga kungiyar ta Kano Pillars bane. Illa ma dai cutar da Kungiyar da magoya baya na hakika ne.

A karshe, addua ta ga Kungiyar, Allah ya dawo da  martabarta da daukakarta. Allah ya kuma kare faruwar irin wannnan lamarin mara dadi a gaba. Ameen.

Jamilu Uba Adamu

Mai sharhi da bibiyar 

Wasan Kwallon Kafa ne

jamiluubadamu@yahoo.com.

Click to comment

Leave a Reply

Your email address will not be published. Required fields are marked *

Hausa

An fake da taimako, ana yaɗa da’awar luwaɗi da maɗigo a jihar Kano!

Published

on

 

 

Misbahu Hamza

 

Zuwa Ga Gwamnatin Jihar Kano, Masarautar Kano, Hukumar Hisba, Da Ƙungiyar Mallaman Jihar Kano

Assalamu Alaikum,

Da sunan ƴancin ɗan Adam; da sunan nema wa ƴaƴanmu mata ƴanci da sana’a mai ɗorewa; da sunan taimakawa marayu, gajiyayyu da masu buƙata ta musamman, ana ta ƙoƙarin yaɗa da’awar luwaɗi da maɗigo a jihar Kano!

Ana yaɗa wannan manufa ne a bainar jama’a babu kunya ballantana ganin girmanku ko shakkarku a matsayinku na masu faɗa a ji a jihar Kano—a makarantu da unguwanni. Abin takaici ma har da ma a tsakanin ma’aikatun gwamnati (masu ɗamara)!

Ƙungiyar da ta ke ta wannan mummunan aiki a jiharmu ita ce “Women Initiative for Sustainable Empowerment and Equality.” Suna kiran kansu “WISE” a taƙaice kuma a bayanin da muka gani a shafukan su, har ofishi suke da shi mai zaman kanshi a Yankaba Kawaji, Bompai GRA, Kano.

A wani bayani da muka gani a shafukan wannan ƙungiya, mun ga sun taɓa haɗa bita wa jami’an Hisba, da na KAROTA, da na NDLEA, da sauransu!

Domin tabbatar da duk waɗannan abubuwa, a duba shafinsu kawai na Facebook mai suna “Wise Wage.”

In har wannan ƙungiya ta yi ƙarfin da za ta tara waɗannan jami’ai a wuri guda da sunan yi musu bita—a kan ko ma mene ne—to muna tsoron irin tasirin da suka riga suka yi a cikin jihar mu. Jihar musulunci.

Za ku iya tunawa a makon nan me ƙarewa ne ake ta dambarwar kuɗaɗe da gwamnatin tarayya ta karɓo daga ƙasashen Turai wanda ake zargin cewa ɗaya daga cikin sharuɗɗan amfana da wannan maɗuɗun kuɗaɗe shi ne a sakarwa masu da’awar luwaɗi da maɗigo mara, irin su WISE, su fantama baɗalarsu yadda suke so.

Wannan ya jawo kace nace a ƙasarnan. Kuma mun ga yadda Mallaman jihar Kano ku ka tashi tsaye a mimbari, kamar yadda muka yi tunanin za ku yi, domin yin tofin Allah tsine da wannan yunƙuri matuƙar ya tabbata gaskiya.

Wannan dambarwar ta ƙara bayyanar mana cewa a ƙasarnan akwai doka da kai tsaye ta yi hani da duk wani yunƙuri ko yaɗa manufar luwaɗi da maɗigo. Kuma mun ƙara samun natsuwa ganin yadda Musulmi da Kirista suka haɗa kai domin barranta da wannan ɓarna.

Da wannan muke kiran Gwamnan jihar Kano, Alhaji Abba Kabir Yusuf, da Sarkin Kano, Mallam Muhammadu Sanusi II, da Shugaban Hisba ta Kano, Mallam Aminu Daurawa, da Shugabancin Kungiyar Mallaman Jihar Kano, da su tabbatar wannan ƙungiya ta WISE ta tattara ƙomatsonta ta bar mana gari kuma a haramta mata aiki a jihar ta kowace hanya da za a iya.

Al’ummar jihar Kano amana ne a wajanku! Kuma Allah zai tambaye ku amanar da ya damƙa muku ranar alkiyama!

Mu mun yi namu—isar muku da saƙon. Idan da ba ku san da wannan kungiya ba ko aiyukanta, to yanzu mun sanar da ku.

Bissalam,

Misbahu Hamza

Continue Reading

Hausa

Ruwan sama na barazanar raba hanyar Dawakin kudu zuwa Tsakuwa

Published

on

Nasiru Yusuf Ibrahim

 

Mamakon ruwan saman da ake yi a ‘yan kwanakin nan na barazanar raba hanyar da ta tashi daga Dawakin kudu zuwa garin Tsakuwa.

Wani mazaunin yankin Malam Umar Musa Aliyu Dukawa ya ce zaizayar ta shafi gadar fansallah ne dake Maishudi kan hanyar zuwa garin Tsakuwa.

Malam Musa ya ce a baya ma wurin ya taba riftawa, mutanen garin Tsakuwa suka yi gangami suka gyara.

Ya kara da cewa tsohon dan majalisar Tarayya mai wakiltar Kananan Hukumomin Dawakin kudu da Warawa Hon. Mustapha Bala Dawaki ya taba gyara hanyar.

A don haka ya ce akwai bukatar hukumomi su kawo dauki don gyara hanyar kafin ruwan sama ya raba ta biyu.

Continue Reading

Hausa

Wani Attajiri ya ba da kyautar makabarta a garin Tsakuwa

Published

on

Nasiru Yusuf Ibrahim

 

Wani Attajiri Alhaji Yakubu Dan-Zainab ya ba wa mutanen garin Tsakuwa dake Karamar Hukumar Dawakin Kudu kyautar makabarta.

Shugaban kwamitin Ilimi na Kungiyar Tsakuwa Mu Farka Malam Abdullahi Yusuf Wagadi ne ya bayyana haka ranar Asabar.

Ya ce attajirin ya danka amanar makabartar ne karkashin kulawar Tsakuwa Mu Farka.

Malam Abdullahi Yusuf Wagadi ya ce Kungiyar Tsakuwa Mu Farka za ta tattauna yadda za a katange makabartar a taron da shugabannin Kungiyar za su yi nan gaba.

Kunshin sanarwar ya ce “Wannan ita ce tsohuwar Maqabartar Makau wacce dattijon arziki Alhaji Yakubu Dan-Zainab ya kuma sabunta kyautar ta ga Al’ummar Tsakuwa, karkashin kulawar Kungiyar Tsakuwa Mu Farka. Allahu SWT ya saka masa da mafificin Alkhairi tare da kai ladan gare Shi.

“Idan Allah ya kai Mu taron Shugabancin Tsakuwa Mu Farka da muke gabatarwa online wannan karon zai zo ne a wannan banban dandalin, tattaunawar Meeting din zaifi mai da hankali ne wajen laliban hanyoyin da za mu bi wajen katange wannan makabarta dama sauran makabartunmu da suke garin Tsakuwa.

“Lokaci ya yi da dole sai mun dauko wannan al’adar saboda yadda kullum kasa take kara daraja. Siyan filin makabarta ya fara zamarwa al’umma abu mai wahala birni da kauye.”

Continue Reading

Upcoming Events

There are no upcoming events at this time.

Facebook

Twitter

Trending